Фільм «Вышэй за неба» зьявіўся на торэнтах і на Youtube

Канфлікт паміж стваральнікамі першага моладзевага сэрыялу «Вышэй за неба» і яго замоўнікамі з ПРААН выйшаў на новую ступень. Поўная аўтарская вэрсія фільму, зробленага паводле матэрыялу сэрыяла, была выкладзеная сёньня ў вольны доступ адразу на некалькіх торэнт-сайтах і на Youtube.

«Сябры! Фільм «Выше неба» выйшаў у Сеціва. Яго паспрабуюць выдаліць і зьнішчыць, але яго трэба ратаваць!» — піша ў Фэйсбуку карыстальнік Ernesto Che, які пачаў распаўсюджваць фільм з заклікам дапамагчы ў ратаваньні незалежнага кіно.

Давайце толькі «без танных гробаных беларускіх буслоў!» — Адрэй Курэйчык і рэжысэр-пастаноўшчык Дзьмітрый Марынін пра сытуацыю зь фільмам на прэзэнтацыі кліпа Vinsenta у клюбе «Re:public».

Інфармацыя ў мэдыях пра здымкі сэрыялу зьявілася год таму. Праца ішла хутка і ўжо ў красавіку 2012 было аб’яўлена, што здымкі завершаныя і кіно фактычна гатовае. Але распачаўся скандал.

Каманда, якая працавала над фільмам, раптоўна была адхіленая ад праекту. Сцэнарыст Андрэй Курэйчык і рэжысэр-пастаноўшчык Дзьмітрый Марынін абвінавацілі замоўцаў зь беларускага офісу ПРААН у палітычнай цэнзуры.