Ці дазволяць студэнтам з рэгіёнаў таксама езьдзіць бясплатна

У рэгіёнах пакуль нават ня думаюць аб тым, каб адмяніць студэнтам плату за праезд. Тым часам стала вядома, што на тое, каб студэнты маглі езьдзіць бясплатна, Менск патраціць 150 мільярдаў рублёў — у два разы болей, чым сышло па падтрымку ўсёй сярэдняй адукацыі Беларусі ў 2011 годзе.

Пасьля некалькіх дзён няпэўнасьці, 13 верасьня менскія студэнты, а таксама навучэнцы каледжаў, ПТВ і прафэсійных ліцэяў усё ж атрымалі права езьдзіць у грамадзкім транспарце бясплатна.

Як высьветлілася сёньня, гэта рашэньне абыдзецца менскім уладам у круглую суму:

«Мы накіравалі на падтрымку грамадзкага транспарту Менску да канца года 150 мільярдаў рублёў», — заявіў мэр Менску Мікалай Ладуцька.

Такім чынам, сума, якую губляе Менск у выніку рашэньня дазволіць бясплатны праезд студэнтам, у два разы перавышае бюджэт усёй беларускай сярэдняй адукацыі. Ці складае 60% ад сумы, якую дзяржава зьбіралася ў 2011 годзе патраціць на навуковыя дасьледаваньні.

Але заплаціць за нечаканую міласьць гарадзкіх уладаў прыйдзецца іншым пасажырам: менскі мэр дадаў, што да канца году кошт праезду ў транспарце дасягне 1250 рублёў пры цяперашніх 950 рублёў.

Тым часам у рэгіёнах падтрымаць мясцовых студэнтаў не сьпяшаюцца. Берасьцейскім студэнтам плату за праезд у транспарце адмяняць пакуль не зьбіраюцца, піша «Дзедзіч». У Віцебску ідэю бясплатнага праезду ня толькі рашуча адмаўляюць, але і не прымаюць магчымасьць вяртаньня бясплатнага праезду для школьнікаў, што пазбавіліся такога права ў лютым.

А ў некаторых гарадах, напрыклад, Гомелі, студэнты адкрыта выказваюць сваю незадаволенасьць, як яны лічаць, дыскрымінацыяй па геаграфічнай прыкмеце:

«Чым мы горшыя? Тым больш, што менскія студэнты атрымліваюць вышэйшыя стыпэндыі за нашыя», — пракамэнтавала рашэньне менскіх уладаў гомельская студэнтка.

Інтэрфакс таксама патэлефанаваў у Гомельскі і Магілёўскі аблвыканкамы. Там журналістам адказалі, што чакаць на адмену платы за праезд для тамтэйшых студэнтаў ня варта. Затое школьнікі гэтых рэгіёнаў ужо даўна перасоўваюцца ад хаты да школы без квіткоў.

Тым часам гарадзенскія аўтобусны парк заявіў, што ўводзіць 50% зьніжку для студэнтаў, што едуць па маршруце Гародня-Менск і Гародня-Берасьце. Прапанова дзейнічае да 30 чэрвеня і толькі па пятніцах, суботах і нядзелях. Квіток з Гародні да Менску каштуе цяпер каля 50 тысячаў.

Рэакцыя блогераў на прапанову аб адмене платы за праезд для студэнтаў